ភ្នំពេញ៖ នាយករដ្ឋមន្ត្រីឥណ្ឌា រី ណារិនដ្រា ម៉ូឌី បានសន្យារក្សាសន្តិភាពអាស៊ីប៉ាស៊ីហ្វិកក្នុងអំឡុងកិច្ចប្រជុំកំពូលអាស៊ាន-ឥណ្ឌាលើកទី១៨ ដែលធ្វើឡើងនៅថ្ងៃព្រហស្បតិ៍។ កិច្ចប្រជុំកំពូលនេះមានការចូលរួមដោយ លោកនាយករដ្ឋមន្ត្រី ហ៊ុន សែន របៀបវារៈសំខាន់មួយគឺ ការអនុម័តសេចក្តីប្រកាសរួមស្តីពីកិច្ចសហប្រតិបត្តិការអាស៊ានទស្សនវិស័យស្តីពីឥណ្ឌូប៉ាស៊ីហ្វិក។
ក្នុងកិច្ចប្រជុំនេះក៏បានលើកឡើងផងដែរថាទោះបីជាជំងឺកូវីដ-១៩ នៅក្នុងប្រទេសឥណ្ឌា និងបណ្តាប្រទេសអាស៊ានមានភាពធ្ងន់ធ្ងរក៏ដោយ ក៏កិច្ចសហប្រតិបត្តិការរវាងភាគីទាំងពីរនៅតែល្អនិងរីកចម្រើន។ មេដឹកនាំអាស៊ានបានថ្លែងអំណរគុណដល់ប្រទេសឥណ្ឌាសម្រាប់ការគាំទ្រការប្រយុទ្ធនឹងជំងឺកូវីដ-១៩ផងដែរ។
ឥណ្ឌាគឺជាប្រទេសមួយក្នុងចំណោមប្រទេសដែលផលិតវ៉ាក់សាំងប្រឆាំងនឹងកូវីដ-១៩ ជាពិសេសវ៉ាក់សាំងAstraZeneca។ ក្រៅពី វ៉ាក់សាំងឥណ្ឌាក៏បានផ្តល់វិភាគទាន ១លានដុល្លារដល់មូលនិធិអាស៊ានសម្រាប់វិបត្តិកូវីដ-១៩។
មេដឹកនាំទាំងអស់បានទទួលស្គាល់ឆ្នាំ២០២២ ជាឆ្នាំសម្រាប់មិត្តភាពអាស៊ាន-ឥណ្ឌា ខណៈដែលវាជាខួបលើកទី៣០នៃភាពជាដៃគូសន្ទនាអាស៊ាន-ឥណ្ឌា។ ប្រមុខរដ្ឋអាស៊ាន-ឥណ្ឌាបានទទួលស្គាល់ពីសារៈសំខាន់នៃការពង្រឹងកិច្ចសហប្រតិបត្តិការលើការតភ្ជាប់អាស៊ាន ជាពិសេសកិច្ចខិតខំប្រឹងប្រែងដើម្បីជំរុញបន្ថែមទៀតនូវផែនការមេនៃការតភ្ជាប់អាស៊ានឆ្នាំ២០២៥៕
